سگریٹ پر فیڈرل ایکسائز ڈیوٹی میں اضافے سے 220 ارب سے زائد آمدنی متوقع

سگریٹ پر فیڈرل ایکسائز ڈیوٹی میں اضافے سے 220 ارب سے زائد آمدنی متوقع

اسلام آباد – عمراانہ کومل

صحت عامہ سے منسلک ماہرین اور سماجی کارکنان نے پاکستانی حکومت کے تمباکو پر ٹیکس بڑھانے کے اقدام کی حمایت کرتے ہوۓ حکومت کو سراہا ہے۔ سماجی تنظیم سوسائٹی فار دی پروٹیکشن آف دی رائٹس آف دی چائلڈ (سپارک) کا مطالبہ ہے کہ سگریٹ ٹیکس میں اضافے کے مثبت نتائج پر روشنی ڈالی گئی۔ ماہرین نے اس پیشرفت کی وجہ حکومت کے دانشمندانہ فیصلوں اور مضبوط عزم کو قرار دیا ۔

ملک عمران احمد، کمپین فار ٹوبیکو فری کڈز کے کنٹری ہیڈ نے بتایا کہ اس سال سگریٹ پر فیڈرل ایکسائز ڈیوٹی میں اضافے کے نتیجے میں قومی خزانے کو تقریباً 220 ارب کی آمدنی ہوگی ۔ تمباکو پر ٹیکس میں اضافے کے نتیجے میں ممکنہ معاشی فوائد بہت زائدہ ہیں۔ اس اقدام سے حکومتی محصولات میں اضافہ اور ساتھ ہی سگریٹ کی بلند قیمتوں کے ذریعے نوجوانوں کو تمباکو سے متعلقہ خطرات سے بچانے میں پاکستان کو نمایاں طور پر فائدہ پہنچے گا۔ اس آمدنی کو استعمال کرتے ہوئے، پاکستان صحت کی دیکھ بھال، تعلیم اور بنیادی ڈھانچے کی ترقی سمیت ضروری شعبوں میں بہتری لا سکتا ہے۔ مزید برآں، صحت مند قوم زیادہ پیداواری افرادی قوت میں حصہ ڈال کر ملک کو استحکام مہیا کرے گی۔

ڈاکٹر ضیاء الدین اسلام، سابق تکنیکی سربراہ،تمباکو کنٹرول سیل وفاقی وزارت صحت، نے تمباکو کنٹرول کے حوالے سے پاکستان کے بین الاقوامی وعدوں کو برقرار رکھنے کے لیے سگریٹ ٹیکس میں سالانہ ترمیم کی ضرورت پر زور دیا۔ بڑھے ہوئے ٹیکسوں سے حاصل ہونے والی اضافی آمدنی ملک کے اندر موجودہ اور مستقبل کے معاشی چیلنجوں سے نمٹنے میں اہم کردار ادا کرے گی۔ سگریٹ تمباکو نوشی سے منسلک صحت کے منفی نتائج متعدد مہلک بیماریوں سے جڑے ہوئے ہیں۔ سالانہ بنیادوں پر اس اضافی ٹیکس میں اضافے کو نافذ کرنا سگریٹ کو مہنگا بنا کر عوام کی فلاح و بہبود کے تحفظ کے لیے ایک موثر حکمت عملی کے طور پر کام کر سکتا ہے، اس طرح صحت کی دیکھ بھال کے نظام پر پڑنے والے دباؤ کو کم کیا جا سکتا ہے۔

سپارک کے پروگرام مینیجر خلیل احمد ڈوگر نے حکومت کی طرف سے سگریٹ پر ٹیکس بڑھانے کے فیصلے کی حمایت کی اور پاکستان کے نوجوانوں اور معیشت کے مستقبل کے بارے میں امید کا اظہار کیا۔ انہوں نے نشاندہی کی کہ اس ٹیکس میں اضافے نے پاکستان کو بین الاقوامی معیار سے قریب ہے اور مسلسل کوششوں سے ملک موجودہ اور آنے والی نسلوں کو تمباکو کے مضر اثرات سے بچا سکتا ہے۔ خلیل نے مزید کہا کہ جب دنیا تمباکو کے استعمال سے بڑھتے ہوئے صحت کے چیلنجوں سے نبرد آزما ہے، پاکستان کے پاس دوسروں کی رہنمائی کرنے کا منفرد موقع ہے۔ تمباکو پر ٹیکس میں اضافے کے مطالبے پر دھیان دے کر، حکومت صحت مند آبادی، مضبوط معیشت اور سب کے لیے روشن مستقبل کی راہ ہموار کر سکتی ہے۔