اسلام آباد(عمرانہ کومل) سماجی کارکنوں نے حکومت پر زور دیا ہے کہ وہ انٹرنیشنل مانیٹری فنڈ (آئی ایم ایف) کے مقرر کردہ معیار کو پورا کرنے کے لئے تمباکو کی مصنوعات پر ہیلتھ لیوی کے نفاذ جیسے پائیدار اقدامات کرے. سوسائٹی فار دی پروٹیکشن آف دی رائٹس آف دی چائلڈ (اسپارک) کی جانب سے جاری کردہ پریس ریلیز میں، صحت کے کارکنوں نے پاکستان کی مالی پریشانیوں کو حل کرنے کے لیے تمباکو ہیلتھ لیوی کو ایک منافع بخش اور پائیدار آپشن قرار دیا اور حکومت سے سفارش کی کہ وہ ضروری اشیاء پر ٹیکس بڑھانے کی بجائے اس راستے کو اپنائے۔
ملک عمران احمد، کنٹری ہیڈ، کمپین فار ٹوبیکو فری کڈز نے ذکر کیا کہ حکومت نے بارہا کہا ہے کہ ریاست کے خزانے کو بھرنے اور آئی ایم ایف کی شرائط کو پورا کرنے کے لیے اسے سخت فیصلے کرنے ہوں گے۔ تاہم ایک ایسا شعبہ ہے جہاں ٹیکس میں اضافہ منطقی اور فائدہ مند ہے اور وہ ہے تمباکو کا شعبہ۔
ملک عمران نے بتایا کہ تمباکو سے پیدا ہونے والی بیماریاں پاکستان پر سالانہ 615 ارب کا معاشی بوجھ لاتی ہے جو کہ پاکستان کی جی ڈی پی کا 1.6 فیصد ہے۔ دوسری جانب تمباکو کی صنعت سے حاصل ہونے والی آمدنی 120 ارب ہے۔ جب کوئی پروڈکٹ نظام صحت کو اتنا نقصان پہنچا رہی ہو، تو اس پر صحت ٹیکس عائد کرنا ضروری ہے۔ پاکستان نے 2019 میں تمباکو ہیلتھ لیوی بل کی شکل میں درست سمت میں قدم بڑھانا چاہا لیکن تمباکو کی صنعت کی مسلسل مداخلت کی وجہ سے یہ منصوبہ پایہ تکمیل نہیں پہنچ سکا۔
ڈاکٹر ضیاء الدین اسلام، سابق ٹیکنیکل ہیڈ، ٹوبیکو کنٹرول سیل، وزارت صحت نے کہا کہ تمباکو کی مصنوعات غیر ضروری اور خطرناک اشیاء ہیں جو پاکستان میں ہر سال 170,000 اموات کا سبب بنتی ہیں۔ اوسطاً، پاکستانی سگریٹ نوشی اپنی اوسط ماہانہ آمدنی کا 10 فیصد سگریٹ پر خرچ کرتے ہیں۔ سستی اور آسان دستیابی کی وجہ سے ملک میں تقریباً 1200 بچے روزانہ سگریٹ نوشی شروع کر دیتے ہیں۔ پاکستان جیسی ترقی پذیر معیشت قیمتی انسانی اور مالیاتی وسائل کے اتنے زیادہ نقصان کا متحمل نہیں ہو سکتی۔ ضروری اشیاء پر ٹیکس لگانے کی بجائے جس سے مہنگائی بڑھے، حکومت کو چاہیے کہ وہ ، اور تمباکو سے متعلق اموات اور بیماری کو کم کرنے کے لیے تمباکو کی مصنوعات پر موجودہ ایف ای ڈی بڑھانے کے علاوہ ہیلتھ لیوی عائد کرے جو کہ ہماری صحت کے مسائل کا سب سے بڑا ذریعہ ہیں۔
سپارک کے پروگرام مینیجر خلیل احمد ڈوگر نے کہا کہ اس مشکل مالی صورتحال میں دیرپا اقدامات کی ضرورت ہے۔ پاکستان اپنے شہریوں کو مالیاتی تباہی سے بچانے کے لیے بیرونی امداد کا خواہاں ہے۔ اس لیے حکومت کو چاہیے کہ وہ ایسے فیصلے کرے جس سے عوام کو فائدہ ہو۔ یک وقتی اقدامات ہمیں ایک بار پھر اسی دوراہے پر لے آئیں گے اور ہمیں دوبارہ غیر ملکی امداد مانگنی پڑے گی۔ لہذا یہ ضروری ہے کہ ایسے فیصلے کیے جائیں جن سے طویل مدتی فوائد حاصل ہوں۔ اس میں تمباکو کی مصنوعات اور سافٹ ڈرنکس پر ہیلتھ لیوی کا نفاذ شامل ہے۔ یہ اقدامات ہمیں کثیر مطلوبہ آمدنی پیدا کریں گے اور صحت کی دیکھ بھال کے اخراجات کو بچائیں گے جس سے قومی خزانے کو مدد ملے گی۔